MUP: Prepoznaj. Prijavi. Zaštiti. Ne okreći glavu – jedan poziv može spasiti nečiji život
Ilustracija (foto: Freepik)
Ministarstvo unutrašnjih poslova (MUP) povodom 30. jula – Svjetskog dana borbe protiv trgovine ljudima – pozvalo je građane i građanke da budu aktivni partneri u suzbijanju jednog od najtežih oblika organizovanog kriminala i grubog kršenja ljudskih prava.
Iz MUP-a upozoravaju da trgovina ljudima nije problem koji se dešava negdje daleko, već da može biti prisutna u svakodnevnom okruženju – na radnom mjestu, u komšiluku ili na internetu.
Trgovina ljudima ne bira godine, pol, obrazovanje ili mjesto stanovanja. Žrtve mogu biti žene, muškarci i djeca, a eksploatacija se može odvijati kroz seksualnu i radnu eksploataciju, prisilno prosjačenje, prisilne brakove, kriminalne aktivnosti ili druge oblike iskorišćavanja – navodi se u saopštenju.
Posebnu zabrinutost, kako ističu iz Ministarstva, izaziva činjenica da se značajan dio vrbovanja danas odvija putem društvenih mreža i digitalnih platformi, gdje počinioci lako ostvaruju kontakt sa djecom, mladima i drugim ranjivim kategorijama stanovništva.
Kako upozoravaju, trgovina ljudima često počinje naizgled bezazlenim ponudama za posao, stipendiju, putovanje ili emotivnu vezu, a završava eksploatacijom, nasiljem i oduzimanjem osnovnih ljudskih prava.
Iz MUP-a podsjećaju da žrtve često nijesu u mogućnosti da same zatraže pomoć zbog straha, prijetnji, manipulacije ili zavisnosti od počinilaca, zbog čega je posebno važno da građani prepoznaju moguće pokazatelje trgovine ljudima i svaku sumnju prijave nadležnim institucijama.
Borba protiv trgovine ljudima nije zadatak samo policije, tužilaštva ili organizacija koje pružaju podršku žrtvama. To je zajednička odgovornost institucija, civilnog društva, medija, obrazovnog sistema i svakog pojedinca jer samo zajedničkim djelovanjem možemo stvoriti društvo u kojem nema mjesta trgovini ljudima – poručili su iz Ministarstva.
Građani sumnju na trgovinu ljudima mogu prijaviti Upravi policije na broj 122, kao i putem SOS telefona za žrtve trgovine ljudima 116666, koji je dostupan 24 sata dnevno, sedam dana u sedmici. Pozivi su besplatni, povjerljivi i anonimni, a podrška je dostupna na crnogorskom, albanskom, ruskom, ukrajinskom i engleskom jeziku.
Iz Ministarstva su pozvali građane da ne ignorišu sumnju na trgovinu ljudima, naglašavajući da će nastaviti da jačaju partnerstvo sa građanima i organizacijama koje pružaju zaštitu žrtvama.
Prepoznaj. Prijavi. Zaštiti. Ne okreći glavu – jedan poziv može spasiti nečiji život – zaključuje se u saopštenju MUP-a.
Izvor: ETV
Obavezno je navođenje izvora, autora i veze (“linka”) na izvorni sadržaj u novinarskom prilogu u kojem se poziva na autorski sadržaj s Cetinjskilist.com.
Veze (“linkovi”) na autorski sadržaj, pripadajući naslovi i eventualno drugi djelovi opreme teksta mogu se slobodno objavljivati ali bez ikakvih izmjena. Nije dopušteno mijenjanje smisla citata izvan konteksta, niti korištenje sadržaja u reinterpretiranom obiku. Ova pravila važe i za prenošenje sadržaja na Facebook i drugim platformama.
Cetinjskilist.com ne preuzima bilo kakvu odgovornost s obzirom na korištenje sadržaja od trećih osoba.
Pogledajte još iz rubrike "Društvo"
